هاشم ترلان ابدیته قووشدو (سارابیین مئهریوان بؤلگه سیندن ایدی
شنبه 22 آذر 1393
+0 به یه ن
هاشم ترلان ابدیته قووشدو
آذربایجانین قوجامان شاعری هاشم ترلان ابدیته قووشدو
۲۵/۸/۱۳۹۳ یکشنبه گونو استاد هاشم ترلان ( سیدهاشم حسن زاده) دونیاسین دگیشدی . ۲۶/۸/۹۳ دوشنبه گونو هاشم ترلان یاخین فامیل لری و آذربایجان ادبیاتینا ماراق گؤرسدنلرین چینینده ، تهرانین بهشت زهرا مزار لیغین ۳۱۵ اینجی قطعه سینده توپراغا تاپشیریلدی. شاعرین ترحیم مجلسی ۳۰/۸/۱۳۹۳ جمعه گونو، تهرانین امام زاده حسن محله سینین روزبهانی محله سینده ساعت ۲ دن ۴ ده قدر اولاجاقدیر.
استاد هاشم ترلان، ۱۳۰۲ اینجی ایلده آذربایجانین باشکندی محتشم باکی شهرینده دونیایا گلدی .
سید هاشم حسن زاده «هاشم ترلان»ین عائله سی ، سرابین آلان بیر اووج محالینین ، زنگی اووا کندیندن اولموشدور. او زامانلار ، ایران آذربایجانین اقتصادی دورومو یاخشی اولمادیغی اوچون ، ترلانین عائله سی باکی شهرینه کوچماق مجبوریتینده قالمیشدیلار.
کیچیک یاشلی سید هاشم ، جوان چاغلاریندا آنا دیلی و آذربایجان ادبیاتینا ماراق گؤرسدیب ، و او زامان دئدیغی شعرلر ، باکی نین «پیونر» درگی سینده ، صمد وورغونون یول گؤسترمه لری آلتیندا یایلمیشدی .
۱۹۳۸ اینجی ایل ، ایرانین وروسیه نین دیکتاتوری رژیم لری نین آنلاشمالاری اساسیندا ، یوخاری آذربایجاندا اولان ایرانلی لار بیر داها دیدرگین دوشوب آوارالیغا معروض قالدیلار. بو دؤنه هاشم ترلانین عائله سی ، تهرانا کؤچماغا مجبور قالیر. بو ایللر مصادیف ایدی ایرانین ۱۳۲۰ حرکاتی ایله جوان شاعر او زامانین حرکاتیندا گوجلو تأثیر بیراخیب و آتشین شعرلری ایله او زامانین درگی لری : آزاد ملت ، وطن یولوندا ، خاورنو ، آذربایجان و بو کیمی نشریه لرده ، آذربایجان ملتینین حق لریندن مدافعه ایله دی.
۱۳۲۴-۱۳۲۵ آذربایجاندا ملی دولت(فرقه دموکرات آذربایجان ) یاراندی. بوزامان استاد هاشم ترلان بیریئتیشمیش شاعیرکیمی اؤز خلقینین خدمتینده ایدی . ملی حکومت دورنده ، آذربایجان ادبیاتیندا نهنگ آدیم لار آتیلدی وبو زامان هاشم ترلان وارگوجو ایله آنا وطنینین ادبیات واینجه صنعت سنگرلرینه قاتیلدی. او زامانین قیزیل کیتابی شاعرلرمجلسی نین ۳۰۵ و۳۰۶ اینجی صفحه لری بو گؤرکملی شاعرین اوچ شعری چاپ اولوب .
۲۶/۱۰/۱۳۵۷ اینجی شاه قاچان گونو، ایراندا اولین تورکو روزنامه وکل ایراندا اولین آزاد روزنامه چوخ یوخاری تیراژدا یایلدی. بو زامان استاد هاشم ترلان اؤز دوغما همشهریلرینین یاردیمینا گلیب و «اولدوز روزنامه سی » نین شعر و ادبیات ساحه سینده یایلان بولومونده اشتراک ائدیب و دیرلی اویودلر وئردی .
اینقلابدان سونرا چیخان تورکو نشریه لرین اکثرینده اوستاد هاشم ترلانین ایزی گؤرونماقدا دیر. ایران تورکلرینین گؤزه گلن ادبی درنگی صابر انجمنی بو کیشی لرین همتی ایله ایاق اوسته دورماسی وبو گونه قدر پارلاق اولدوز کیمی پاریلداماسی بوقوجامان آتا لاریمیزدان آسیلیدیر
بوگونه قدراوستادین آلتی اثری یایلیب و تورک ادبیاتینا ماراق گؤرسدنلرین طرفیندن ذوق و شوق ایله آلقیش لانیب :
۱ – آلاولو شعرلر نشرپویا ۱۳۵۸
۲- دورنالار گلنده نشرمینا ۱۳۷۷
۳- آراز گولور انتشارات آذربایجان ۱۳۷۸
۴ – یولچو یولدا گرک نشر مینا ۱۳۸۳
۵ – گوموشو پنجک نشرفیروزان ۱۳۸۷
۶- زیروه ده گونش نشر فیروزان ۱۳۸۸
اوستادین بیرپارا ال یازمالاری هله یایلمایب انشا الله شاعرین یاخین یولداشلارینین همتی ایله بو تز لیکده یایلماسین گؤزله ییریک روحو شاد اولسون بیر شعر ایله سؤزو موزه سون قویوروق .
سایقی لاریم لا : حمید احمدزاده
دیلیمی قایتارین منه
هاشم ترلان
غربت ائلده غریبسه‌دیم
ائلیمی قایتارین منه!
دره‌لریم کؤز باغلاییب
سئلیمی قایتارین منه!
×
آختاریرام حزین- حزین
ایتیردیگیم گولون ایزین
دونیادا هر نه وار سیزین
گولومو قایتارین منه!
×
دیل دئییرم… منی آنمیر
سسله‌ییرم، او دایانمیر
نوه‌لریم منی قانمیر
دیلیمی قایتارین منه!
×
باخ اورمودان گؤی خزره
اوخشار سنی هر منظره
بو آذردن او آذره
ایلیمی قایتارین منه!
×
آذری‌یم ائلیم، واریم
هارای سالیر سؤز قاتاریم
سوسوز قالیب سونالاریم
گؤلومو قایتارین منه!
×
شاعر ده وار سؤز اوینادان
گونبز اوسته قوز اوینادان
فقط منه گورز اوینادان
الیمی قایتارین منه!
×
دیلیم گئتسه قالار نه‌ییم
نئجه بو درده بئل اییم
نسیمی‌دن اؤیرندیگیم
تعلیمی قایتارین منه
